കട്ടപ്പന, 2026 ജൂൺ 22 –

പുതിയ സർക്കാരിന്റെ തുടക്കമായി അവതരിപ്പിച്ച ബഡ്ജറ്റ് കർഷക സമൂഹത്തെ അവഗണിച്ചതാണെന്ന് അഖിലേന്ത്യ കിസാൻ സഭ സംസ്ഥാന വൈസ് പ്രസിഡന്റ് മാത്യു വർഗീസ് ആരോപിച്ചു. കഴിഞ്ഞ ബഡ്ജറ്റിലുണ്ടായിരുന്ന വകയിരുത്തലുകൾ പോലും വെട്ടിക്കുറച്ചത് കാർഷികോൽപാദനത്തെ പ്രതികൂലമായി ബാധിക്കുമെന്ന് അദ്ദേഹം പറഞ്ഞു. കാർഷിക മേഖലയിലെ വിളകളുടെ മെച്ചപ്പെട്ട വളർച്ചയ്ക്കും നല്ല വിളവ് ലഭിക്കാനും ആവശ്യമായ രാസവളങ്ങളും കീടനാശിനികളും കുറഞ്ഞ വിലയിൽ ലഭ്യമാക്കാനുള്ള നിർദ്ദേശങ്ങൾ ബഡ്ജറ്റിലില്ലെന്നും വിമർശിച്ചു.

ഏലം, കുരുമുളക്, കാപ്പി, കൊക്കോ, തേയില തുടങ്ങിയ നാണ്യവിളകൾക്കും പഴങ്ങൾക്കും പച്ചക്കറികൾക്കും സ്ഥിരമായി ലാഭകരമായ വില ഉറപ്പാക്കുന്ന പദ്ധതികൾ പ്രഖ്യാപിച്ചിട്ടില്ലെന്ന് മാത്യു വർഗീസ് പറഞ്ഞു. റബ്ബറിന് ഇന്ത്യയിലെയും അന്തർദേശീയ വിപണിയിലെയും നിലവിലുള്ള വിലയേക്കാൾ കുറഞ്ഞ താങ്ങുവിലയാണ് പ്രഖ്യാപിച്ചതെന്നും കടക്കെണിയിൽ നിന്ന് കർഷകരെ രക്ഷിക്കാനുള്ള നടപടികളില്ലെന്നും അദ്ദേഹം കുറ്റപ്പെടുത്തി. കർഷക പെൻഷനെക്കുറിച്ചും കർഷക ക്ഷേമനിധി ബോർഡിന് സഹായം നൽകുന്നതിനെക്കുറിച്ചും ബഡ്ജറ്റിൽ പരാമർശമില്ലെന്നും ആരോപിച്ചു.

ആരോഗ്യരംഗത്ത് പിന്നാക്കം നിൽക്കുന്ന മലയോര മേഖലയെ പൂർണമായി അവഗണിച്ചെന്നും മുൻ സർക്കാർ ആരംഭിച്ച വികസന പ്രവർത്തനങ്ങളെ നിഷേധിച്ചിരിക്കുകയാണെന്നും മാത്യു വർഗീസ് പറഞ്ഞു. കട്ടപ്പന-തേനി തുരങ്കപാത ഉപേക്ഷിച്ച മട്ടാണുള്ളതെന്നും ശീതകാല പച്ചക്കറി കൃഷിയെയും കരിമ്പുകർഷകരെയും ബഡ്ജറ്റ് മറന്നുവെന്നും വിമർശിച്ചു. അതേസമയം, ഭൂപ്രശ്നങ്ങൾ പരിഹരിക്കുമെന്ന പ്രഖ്യാപനത്തെ സ്വാഗതം ചെയ്ത അദ്ദേഹം, രണ്ടാം ഭൂപരിഷ്കരണമെന്ന നിർദ്ദേശം ഗൗരവമായി ചർച്ച ചെയ്യേണ്ടതാണെന്നും അഭിപ്രായപ്പെട്ടു.