കള്ളപ്പണത്തിന്റെ വിനിമയവും ഭീകര പ്രവർത്തനങ്ങൾക്കായി പണം പമ്പ് ചെയ്യുന്നതും ആഗോള രാഷ്ട്രീയ സ്വസ്ഥതയെ ബാധിക്കുന്ന ഗുരുതരമായ പ്രശ്നമാണ്.ഇന്ത്യ അതിന്റെ പ്രധാന ഇരകളിൽ ഒന്നാണ്.ഈ പ്രശ്നങ്ങൾ ആഗോളതലത്തിൽ പരിഹരിക്കുന്നതിന് വേണ്ടി ഉണ്ടാക്കിയിട്ടുള്ള ഫിനാൻഷ്യൽ ആക്ഷൻ ടാസ്ക് ഫോഴ്സ് എന്ന സംഘടനയുടെ അധ്യക്ഷസ്ഥാനത്തേക്ക് ഇന്ത്യൻ പ്രതിനിധി എത്തുകയാണ്.കേന്ദ്ര ആഭ്യന്തര സെക്രട്ടറിയാണ് ഇന്ത്യയെ പ്രതിനിധീകരിച്ച് ഉപാധ്യക്ഷൻ ആകുന്നത്.ഇന്ത്യയിൽ പദവി കൈവരിക്കുന്നതോടെ ഇന്ത്യയെ രക്ഷപ്പെട്ട നടത്തിയിട്ടുള്ള കള്ളപ്പണത്തിന്റെ വിനിമയങ്ങളും ഭീകര പ്രവർത്തനങ്ങൾക്കായി പല വഴികളിലൂടെ നടത്തിയിട്ടുള്ള ഫണ്ടിങ്ങിനെ സംബന്ധിച്ചുള്ള വിവരങ്ങളും ആഗോളതലത്തിൽ ഏകോപിപ്പിക്കുന്നതിനും ലഭ്യമാക്കുന്നതിനും അന്വേഷിക്കുന്നതിനും സഹായകമായ സാഹചര്യമാണ് ഉണ്ടായിട്ടുള്ളത്.

ഇന്ത്യക്ക് ചരിത്രനേട്ടം

ലോകമെമ്പാടുമുള്ള കള്ളപ്പണ ഇടപാടുകൾ, ഭീകര സംഘടനകളുടെ ധനസമാഹരണം, സാമ്പത്തിക കുറ്റകൃത്യങ്ങൾ എന്നിവയെ നിയന്ത്രിക്കാൻ രൂപീകരിച്ച അന്തർദേശീയ സംഘടനയാണ് ഫിനാൻഷ്യൽ ആക്ഷൻ ടാസ്‌ക് ഫോഴ്സ് (FATF). 1989-ൽ ജി-7 രാജ്യങ്ങളുടെ മുൻകൈയിൽ രൂപം കൊണ്ട ഈ സംഘടന രാജ്യങ്ങളുടെ സാമ്പത്തിക നിയമങ്ങളും അന്വേഷണ സംവിധാനങ്ങളും വിലയിരുത്തി അന്താരാഷ്ട്ര മാനദണ്ഡങ്ങൾ നിശ്ചയിക്കുന്നു. 2026 ജൂലൈ മുതൽ 2027 ജൂൺ വരെ ഇന്ത്യ ആദ്യമായി FATF വൈസ് പ്രസിഡൻസി വഹിക്കും. കേന്ദ്ര സർക്കാർ ഉദ്യോഗസ്ഥനായ വിവേക് അഗർവാളാണ് ഈ പദവിയിലേക്ക് തിരഞ്ഞെടുക്കപ്പെട്ടത്. ഇത് ആഗോള സാമ്പത്തിക കുറ്റകൃത്യങ്ങൾക്കെതിരായ പോരാട്ടത്തിൽ ഇന്ത്യയുടെ സ്വാധീനം വർധിച്ചതിന്റെ അംഗീകാരമായാണ് വിലയിരുത്തപ്പെടുന്നത്.

കുറ്റാന്വേഷണത്തിൽ ഇന്ത്യയ്ക്ക് ലഭിക്കുന്ന നേട്ടങ്ങൾ

FATF വൈസ് പ്രസിഡൻസി നേരിട്ട് അറസ്റ്റ് നടത്താനോ അന്വേഷണം നടത്താനോ അധികാരം നൽകുന്നില്ല. എന്നാൽ ലോക രാജ്യങ്ങളിലെ സാമ്പത്തിക ഇന്റലിജൻസ് ഏജൻസികളുമായും അന്വേഷണ സ്ഥാപനങ്ങളുമായും കൂടുതൽ അടുത്ത സഹകരണം സ്ഥാപിക്കാൻ ഇത് സഹായിക്കും. കള്ളപ്പണം വെളുപ്പിക്കൽ, ഹവാല ഇടപാടുകൾ, ഭീകര ഫണ്ടിംഗ്, മയക്കുമരുന്ന് കടത്ത്, അന്തർദേശീയ തട്ടിപ്പുകൾ തുടങ്ങിയ കേസുകളിൽ വിവര കൈമാറ്റം വേഗത്തിലാക്കാനും ഇന്ത്യയുടെ ആവശ്യങ്ങൾക്ക് കൂടുതൽ പ്രാധാന്യം ലഭിക്കാനും സാധ്യതയുണ്ട്. FATF നയരൂപീകരണ ചർച്ചകളിൽ ഇന്ത്യയുടെ ശബ്ദം കൂടുതൽ ശക്തമാകുന്നതും അന്വേഷണ ഏജൻസികൾക്ക് ഗുണകരമാകും.

പാകിസ്ഥാനെപ്പോലുള്ള വിഷയങ്ങളിൽ സ്വാധീനം വർധിക്കുമോ?

FATF ഒരു രാജ്യത്തെ ഗ്രേ ലിസ്റ്റിലോ ബ്ലാക്ക് ലിസ്റ്റിലോ ഉൾപ്പെടുത്തുന്നത് കൂട്ടായ തീരുമാനങ്ങളിലൂടെയാണ്. അതിനാൽ ഇന്ത്യയ്ക്ക് ഒറ്റയ്ക്ക് തീരുമാനമെടുക്കാൻ കഴിയില്ല. എന്നിരുന്നാലും വൈസ് പ്രസിഡൻസി വഴി സംഘടനയുടെ പ്രവർത്തനങ്ങളിലും ചർച്ചകളിലും ഇന്ത്യയ്ക്ക് കൂടുതൽ സ്വാധീനം ചെലുത്താൻ കഴിയും. ഭീകര ഫണ്ടിംഗിനെക്കുറിച്ചുള്ള ഇന്ത്യൻ ആശങ്കകൾ അന്തർദേശീയ വേദിയിൽ കൂടുതൽ ശക്തമായി അവതരിപ്പിക്കാനും അതിർത്തി കടന്നുള്ള സാമ്പത്തിക കുറ്റകൃത്യങ്ങൾക്കെതിരായ സഹകരണം മെച്ചപ്പെടുത്താനും ഈ പദവി സഹായകമാകും. അതുകൊണ്ട് തന്നെ ഇത് ഒരു പ്രതീകാത്മക നേട്ടം മാത്രമല്ല, ഇന്ത്യയുടെ സാമ്പത്തിക സുരക്ഷയ്ക്കും കുറ്റാന്വേഷണ ശേഷിക്കും ദീർഘകാല പ്രാധാന്യമുള്ള നയതന്ത്ര വിജയവുമാണ്.

അന്തർദേശീയ സഹകരണം ആവശ്യമായ കേസുകൾക്ക് കരുത്തേകുമോ?

ഇന്ത്യയിൽ അന്വേഷണം പുരോഗമിക്കുന്ന നിരവധി സാമ്പത്തിക, സൈബർ, ഭീകര ഫണ്ടിംഗ് കേസുകളിൽ വിദേശരാജ്യങ്ങളിലെ ബാങ്ക് അക്കൗണ്ടുകൾ, ഷെൽ കമ്പനികൾ, ക്രിപ്റ്റോ ഇടപാടുകൾ, നികുതി സങ്കേതങ്ങൾ എന്നിവയുമായി ബന്ധപ്പെട്ട തെളിവുകൾ ലഭ്യമാകാത്തത് അന്വേഷണത്തെ പലപ്പോഴും മന്ദഗതിയിലാക്കുന്നുണ്ട്. ബാങ്ക് തട്ടിപ്പുകൾ, ഓൺലൈൻ നിക്ഷേപ തട്ടിപ്പുകൾ, ക്രിപ്റ്റോകറൻസി വഴിയുള്ള കള്ളപ്പണം വെളുപ്പിക്കൽ, അന്തർദേശീയ മയക്കുമരുന്ന് ശൃംഖലകൾ, സൈബർ തട്ടിപ്പുകൾ, ഭീകര ഫണ്ടിംഗ് കേസുകൾ എന്നിവയിൽ വിദേശ ഏജൻസികളുടെ സഹകരണം നിർണായകമാണ്. ചില കേസുകളിൽ പ്രതികളും സാമ്പത്തിക ഇടപാടുകളും വിദേശ രാജ്യങ്ങളിലായതിനാൽ വിവരശേഖരണത്തിനും ആസ്തി മരവിപ്പിക്കലിനും വർഷങ്ങൾ വേണ്ടിവരാറുണ്ട്. FATF വൈസ് പ്രസിഡൻസി പോലുള്ള ഉയർന്ന പദവികൾ ഇന്ത്യയ്ക്ക് ഇത്തരം വിഷയങ്ങളിൽ കൂടുതൽ വിശ്വാസ്യതയും സ്വാധീനവും നൽകുന്നതിനാൽ അന്തർദേശീയ വിവര കൈമാറ്റവും അന്വേഷണ സഹകരണവും വേഗത്തിലാകുമെന്ന പ്രതീക്ഷ അന്വേഷണ ഏജൻസികൾക്കുണ്ട്.